鍾意張敬軒　唔單止係因為佢嘅歌

第一次接觸張敬軒嘅歌，要數返去當年中學唱K嗰陣。聽住同班同學唱到聲嘶力竭走哂音，瘋狂恥笑之餘，都不忘記低歌名。當晚返去重溫原版之後，從此就迷上咗呢位歌手。

出道多年，由《My Way》、《笑忘書》、《櫻花樹下》到近年《青春常駐》、《過客別墅》。張敬軒嘅歌可以話一直保持水準，唱功亦無需質疑。雖然之前叱吒坤哥冒起，風頭完全蓋過哂首奪男金嘅軒仔。但論實力，論熱誠，其實佢早就得到大多數人嘅肯定。

（趁機會重溫下佢同14年男金柏豪合唱嘅《櫻花樹下》）

然而，筆者欣賞張敬軒，並唔單止係佢音樂上嘅造詣同堅持，亦同時欣賞緊佢「敢言」嘅一面。近呢幾年差唔多樣樣事情都政治化，不論藝人歌手甚至幕後，每一言一行都要變得好謹慎，講少錯少，甚至刻意迴避立場，結果幕前嘅一舉一動就成為咗好多人口中嘅「照妖鏡」。

但其實筆者認為佢地咁做都係無可奈何，面對現時嘅大環境，比起大部份人，佢地敢言要付出嘅代價實在係沉重得多。

所以，反過國教、數過建制派議員不是、敢企出嚟批評政府嘅張敬軒，喺當前局勢下其實係相對令人佩服。當然，幾年前佢都因為敢言而出過事，受盡批評甚至陷入低潮。但人無完人，我地或多或少都錯過誤判過，知錯能改先係最難能可貴嘅地方。

事隔多年，身為新移民嘅張敬軒，無疑已經比好多所謂香港人更加關心香港，更加似一個香港人。

筆者非常鍾意《青春常駐》呢首歌，雖然歌詞本質上係講緊歲月嘅無聲逝去，但配合埋MV，會好自然咁聯想起現時嘅香港。離開容易留低難，支持同守護就更加難。致皇上，或者將來局勢可能變得更壞，迫使你唔再敢言，但我有個最卑微的願望，望你能夠繼續做好音樂。

祝早日康復，青春常駐。

原文刊於作者「有心無默」Facebook，獲作者授權轉載。